Адыгэ журналист, блоггер, илъэс 26 ныбжьым ита КIуащ Тимур и хэкIуэдэкIэ хъуар иджырэ къыздэсым гурыIуэгъуэкъым. ЦIыхубэ бэдаущ зыужьыныгъэмкIэ президентым деж щыIэ Урысей Уэтым къыхуеджэныгъэ ищIащ журналистым ипэжыпIэкIэ къыщыщIар зэхэгъэкIын хуейуэ.
КIуащ Тимур и жэназыр зэхэтащ езыр къыздалъхуа Къэбэрдей-Балъкъэрым, щэбэт блэкIам. Абы и дэлэжьэгъухэми и ныбжьэгъухэми къалъытэ ар яукIауэ. АрщхьэкIэ полицэм жеIэ абы и Iэпкълъэпкъым удын темылъауэ. И Iыхьлыхэм зэрыжаIэмкIэ абы и блэгущIэм мастэ хэлъхьэпIэ иIэщ.
Бадзэуэгъуэм и 31 пщыхьэщхьэм кIуэда журналистым и хьэдэр къагъуэтыжащ шыщхьэIум и 1-м, мэз лъапэм, Налшык и Iэгъуэблагъэхэм.
Журналист лэжьыгъэм къинэмыщIауэ, КIуащыр жыджэру хэтащ пикетхэмрэ пэкIухэмрэ, ахэм я нэхъыбэм езыр и къызэгъэпэщакIуэу.
И дэлэжьэгъухэм зэрыжаIэжымкIэ, дэIэпыкъуныгъэрэ чэнджэщрэ щIэлъэIуу абы зыкъыхуагъазэт къару къулыкъухэм я зэран зэкIа цIыхухэм.
Журналистыр ткIийуэ ирипсалъэт Сирием икIыжу Ищхъэрэ Кавказым зыгъэзэжа адыгэхэм унафэщIхэр зэрапыкъуэкIым, Къэбэрдей-Балъкъэрым и къару къулыкъухэм зэрахьэ залымыгъэхэм, ар щIэбэнт муслъымэнхэм я хуитыныгъэм.
Хуитыныгъэ Радио